(សៀមរាប)៖ ក្នុងថ្ងៃទីពីរនៃឱកាសបុណ្យចូលឆ្នាំថ្មី ១៥ មេសា ២០២២ ភ្ញៀវទេសចរយ៉ាងច្រើនកុះករបានចូលទស្សនាកម្សាន្តនៅរមណីយដ្ឋានអង្គរ ខេត្តសៀមរាប ខណៈមនុស្សធ្វើដំណើរតាមផ្លូវចេញចូលរមណីយដ្ឋាននេះ ពិសេសផ្លូវតាមកសិន្ធុប្រាសាទអង្គរវត្ត។ នេះបើតាមសេចក្ដីរាយការណ៍ពីទីតាំងរមណីយដ្ឋានអង្គរផ្ទាល់។

គេនៅចាំបានថា កាលពីឱកាសបុណ្យបុណ្យចូលឆ្នាំនាឆ្នាំមុនៗ រមណីយដ្ឋានអង្គរមិនមានភ្ញៀវទេសចរមកលេងច្រើនកុះករដូចឆ្នាំនេះឡើយ នេះក៏ដោយសារស្ថានភាពកូវីដ១៩មិនទាន់ថមថយ ប៉ុន្ដែដោយសាររាជរដ្ឋាភិបាលគ្រប់គ្រងការរីករាលដាលជំងឺកូវីដបានម៉ឺងម៉ាត់ គួបផ្សំនឹងការចាក់វ៉ាក់សាំងបានឆាប់រហ័សផងនោះ ក៏បានឈានដល់ការបើកប្រទេសឡើងវិញ និងជំរុញឲ្យភ្ញៀវទេសចរដើរលេងបានដោយសប្បាយ។

សូមជម្រាបថា នៅថ្ងៃម្សិលមិញ ពោលគឺថ្ងៃទីមួយនៃឱកាសបុណ្យបុណ្យចូលឆ្នាំនេះ ខេត្តសៀមរាបឈរលើលំដាប់ថ្នាក់ទី៣ ដែលមានចំនួន១០៧,០១៤នាក់ បន្ទាប់ខេត្តកំពង់ឆ្នាំង និងខេត្តបាត់ដំបង៕